豬的性格難變成獅子

經過近９個月大升市，上個月大跌市同埋本周失常既反彈，就會深深體會曹 sir 今日專欄尾段所講，係股票市場賺錢，心態比直覺決定重要．．．

豬的性格難變成獅子

唔少人希望買入後立即上升、賣出後立即下跌；反觀大戶入貨愈買愈低、大戶出貨愈賣愈貴。佢地明白大趨勢，利用大趨勢去賺大錢；但散戶最喜歡即食麵！性格係決定投資成敗嘅主因。江山易改，本性難移，冇呢方面性格好難培養。

因此，trading唔係人人可以做得好。作出一個正確決定，涉及大量數據分析及懂得控制自己情緒，明白整個大框框（big themes）非一般人想像中容易，亦非憑直覺可以行事。

例如豬無時無刻都搵食物，卻極容易被人宰殺；反之獅子可以十五天內唔食嘢，一旦攻擊必致獵物於死地。過去五年我老曹以為憑訓練可改變一個擁有「豬」性格嘅朋友變成「獅子」性格，到2005年不得不放棄，因為佢永遠喜歡追逐蠅頭小利，因此而失去賺大錢機會。

性格係冇得改嘅，最後不得不同意法國哲學家Albert Camus嘅理論：人類對抉擇往往表現畏縮，遇到危險採取逃避而非面對，要求投資者止蝕唔止賺，較教佢地登天更難！

大部分投資者需要嘅係對事物嘅結論而非討論，所以提供「跟我買」嘅分析員永遠有追隨者，而要求別人獨立思考者永遠孤獨。何況成功揀股者（Stockpicker）並唔容易做，通常每年只有三幾隻出現，一唔小心便錯過。

分類: 至理名言