唔好信密食當三番 - 信報財經新聞 投資者日記 曹仁超 2007-05-04
成功嘅投資策略係冒最低風險去賺取最大利潤！冇人可以每次選股皆正確，正確態度係一旦發現選股錯誤便行使止蝕盤，而唔係同佢做人世；反之，如選股正確，又何妨「one life one love」（愛你一世）？投資目的唔係賺取10％到20％利潤，而係點樣double或triple你嘅資金。
鯊魚稱霸係因為攻擊力強（咬你一啖唔死都殘廢），獅子稱霸係一擊致命，反而牛羊食草先至係細細嚼慢慢嚥，海中蝦毛才啄啄吓。過去五年我老曹曾每天花半小時以上時間嘗試將一名散戶訓練出大戶嘅性格，最後失敗收場，因此不得不承認「old habit dies hard!」。
其實牛體形較獅子大，如佢發揮攻擊力，獅子未必係佢對手，點解牛往往被獅子吃掉？理由係：一、牛冇勇氣，一見到獅子只會逃跑，唔會對抗。二、只會食草，而唔利用自己鋒利嘅角去攻擊。我老曹不能教一隻牛去擁有獅子嘅性格！90％投資者皆擁有牛羊性格，佢地馴良怕事，只管食草；只有10％投資者才有獅子嘅性格，只要加上適當訓練，便可以成為良好嘅揀股者（stock-picker）。
成功嘅策略：
- 一、無論市好市淡都唔離市。形勢有利時，投資所佔比重大D；形勢不利時，投資所佔比重細D（Stay in the market）。
- 二、入市之前制訂自己嘅投資策略，然後天天?到實，一旦出錯立即糾正，而唔係買入後揸十年八年便可發達。
- 三、控制自己嘅貪念及恐懼感，以平常心對待得失，「得莫喜、失莫憂」。只管止蝕唔止賺，因投資成功必須嚴守紀律。股市冇常勝將軍，Lose in the battle, Win in the War!喺上落市中，損失小小又如何？不過喺大趨勢中一定要勝出。唔好相信密食當三番，贏就贏得大大，輸就輸小小。
- 四、你有冇做富翁嘅勇氣？好多人想發達卻冇勇氣。你有冇諗過每年將資本升值100％？你有冇諗過賺一百萬、一千萬、一億甚至十億？嘩，嚇死人咩！啱，你連諗都怕，又點發達？中國人一直過分強調知足常樂，形成中國人野心唔夠，唔會做野狼，更加唔會做獅子老虎，因為早已失去冒險精神。
今天嘅美國財長保爾森响去年7月10 日辭去高盛主席前，透過投資中國，不但為高盛證券賺取驚人利潤，自己嘅財富亦累積至七億美元。你响中國「十．五」計劃期間又賺咗幾多？「十一．五」規劃已令去年內地金融股、零售股股價暴升，跟住係乜嘢投資？去年連越南股市及樓價亦狂升，你有冇得着？
- 五、係投資策略令你致富，唔係股市貼士。散戶最喜歡貼士，卻唔制訂自己嘅投資策略！你說怎麼辦？今天要致富唔係克勤克儉（如你連原始資本亦冇，才需要克勤克儉），而係來自成功嘅交易（deals）。學習做一個出色嘅 Deal Maker，逃避1997年7月香港樓市回落嘅風險，及利用2001年中國「十．五」計劃下引發嘅工業原材料漲價潮。
利用牛市興旺壯大自己
5月份來港上市嘅內地新股有六隻，佢地係互太紡織、凱普松、百麗、新華文軒、盈進控股及佳華百貨，共集資一百二十四億元，其中以百麗集資額最大，達七十八億元。內地公司不斷來港集資壯大自己，本港H股亦紛紛回歸A股加強資產負債表，大家都利用股市興旺期去壯大自己。牛、熊市自古存在，成功策略係利用牛市壯大自己，喺熊市持盈保泰減少損失。當一個經濟循環完成後，自己已大咗許多！
經濟復甦有如食西餐，雖然已食咗頭盤、主菜甚至甜品，但餐後酒一樣咁精彩！新聞機構宣布高價收購道瓊斯，令道指更上一層樓。有人認為飲完餐後酒便會到朱古力！太早離場不但錯過餐後美酒，可能同時錯過極品朱古力！
分類: investment
沒有留言:
發佈留言