美股尋頂

　　Paul Desmond2002年贏得「查理斯．杜獎」，成為全球最佳技術分析員。最近佢接受訪問時話，大市見底日通常成交大增，以及有90％股份回落；反之大市見頂時，只有少量股份創新高，唔少股份一早已開始回落。

以2000年1月14日為例，當天道指創新高，但股市內早有55.33％股份較最高價回落20％，個別股份早係2000年1月14日前好多個月已開始回落！換言之，由1920年至今過去十四個牛市中，指數創新高個日，創新高股份只佔6.23－22％，大部分股份都係度回落！大市見底時，投資者意志消沉；反之，大市見頂時，投資者皆自鳴得意，因此好消息出貨、壞消息入貨者通常表現較佳。

依家流行睇法係利率快見頂及失業率在下降，但以五十二周為期，最多股份創新高價係去年7月，由此開始創新高價股份正在減少中。以今年1月出現兩個高點個日，大約只有一百五十隻股份創新高；反之，去年7月唔少日子裏，有超過二百二十五隻創新高。上周二美股一天之內大升140點，但只有一百零三隻股份創新高，又較2月份為弱。從呢點睇，美股正在尋頂，尋頂日子可以係數星期甚至數月。

股市每四年一個低潮
　　再研究道指三十隻成分股，目前仍係上升軌者只有10％共三隻，形成下降軌者已有二十隻。今年有段日子美股將幾麻煩，但冇人知道麻煩幾時開始。換言之，依家參差走勢（或個別發展）仍可維持數星期甚至數月。炒賣以中價股為主，直到投資者資金消耗完成為止，或投資者持貨後雖然虧損已超過15％仍唔肯行使止蝕，因為自鳴得意心情令佢地既警覺性下降，認為既然大市仍在上升，手上股票遲早可獲利離場，而毋須行使止蝕，當有一天佢地發現大勢不妙引發恐懼為止，到時熊市又開始。

股市習慣每四年出現一個低潮，例如1949年、1953年、1957年、1962年、1966年、1970年、1974年、1978年、1982年、1987年、1990年、1994年、1998年、2002年；今年係2006年，即另一個四年。上述周期形成，可能同美國總統每四年選舉一次有關，形成總統選舉周期中段經濟表現最弱。

　　基礎分析既弱點係每一個牛、熊市基本因素都唔同，必須十分博學才能了解。技術分析既優點係雖然基本因素唔同，但人既心理一樣，不但非理性，而且係可預測地「非理性」。投資者一而再、再而三犯相同錯誤，一如Hyman Minsky所講：穩定引發不穩定。例如貨幣高速增長，高油價、弱日圓等都影響人類投資心理而形成趨勢，趨勢保持日子愈耐，愈容易引發泡沫，最後必是泡沫爆破。換言之，趨勢一旦形成，就係不穩定金融情況既遠因，因為我地相信明天同今天一樣，明年同今年一樣；今天同昨天一樣、今年同去年一樣，所以我地好容易由小小樂觀發展至極度樂觀，由小小悲觀進入極度悲觀，周而復始，循環不息。

科網股泡沫爆破、「九．一一慘劇」、英隆醜聞、入侵阿富汗然後伊拉克令油價見七十美元等等，都可令穩定變成不穩定而形成趨勢，引發泡沫，最後泡沫爆破。為減輕泡沫爆破所帶黎既苦楚，格蛇2001年起減息，令美國房地產價格大升，然後漸漸引發通脹率上揚，另一趨勢形成及漸成泡沫，刺激金價升至五百七十四美元才調整。以我老曹三十多年投資經驗，無論科技點進步，人類劣根性「貪念」與「無知」仍然存在，並冇改變，資訊發達只令泡沫變得更大、影響範圍更廣及變化更快，尤其衍生工具普及後，許多事物可以係電光火石之間發生。只有保持謙卑及開放態度，才能係投資市場達致成功。基本因素既改變及客觀形勢既變遷，令投資變成好易出錯，事後孔明易做，先知先覺困難。

轉載自: 信報財經新聞 曹仁超 2006-02-21 投資者日記 跌多升少 美股尋頂